教育部捒「台灣台語輸入法」APP 用台灣台語拜年，部長阿公發紅包！

（台灣TB新聞網/資深記者劉志成）新正就欲到矣，咱是毋是當咧煩惱過年賀正的訊息著按怎拍才會有創意佮人情味？教育部為著欲鼓舞全民來體驗新的「台灣台語輸入法」APP，特別按欲佇新正年頭辦「用台灣台語拜年，部長阿公發紅包！」的抽獎活動。對115年2月14到3月初3（元宵），民眾若有掠咱這套APP閣再完成指定的任務，就有機會通提著上懸一萬箍的紅包喔。

當今台灣社會巧手機仔都也真普遍矣，日常生活用數位溝通論真是四常代。總是，猶閣有誠濟民眾就準有心欲拍台灣台語文，煞是「講會講寫都無路來」，教育部為著欲回應咱濟濟民眾的需求，予咱本土語言佇網路世界袂閣再受制限，決心起造一个通支援iOS和Android雙平台的「台灣台語輸入法」APP。

這个APP上大的特色就是有「語音辨識」的功能。民眾免去費神袂曉拍台灣台語字，用「講」的會較規氣。咱直透用手機仔講你想欲講的話，APP就會自動「聽聲出字」，隨共你的語音轉做正範的台灣台語字。無論欲挃漢字抑是羅馬字，有講就有字，看是欲祝咱厝內序大「身體健康食百二。」(Sin-thé kiān-khong tsia̍h pah-jī.)，抑是欲祝咱的好朋友新正年頭「平安順序趁大錢。」(Pîng-an sūn-sī thàn-tuā-tsînn.)，出一聲就浮一字，講會規句就總予你，聖甲予恁此過拜正攏免費氣，祝福滿滿有誠意。

為著欲予閣較濟民眾實際體驗台灣台語輸入法數位化的利便，教育部有按總獎金幾若萬箍的大紅包欲來相送。活動的日子是對115年2月14到3月初3（元宵）。

民眾簡單用四步就通參加抽獎：
1.去App Store抑是Google Play掠咱的「台灣台語輸入法」APP。
2.看是欲用APP的「語音輸入」抑是「台羅輸入」攏好勢，傳3句你想欲共親情朋友講的好話（親像：「新年平安順序」、「馬年趁大錢」……），毋過，若毋是用賀正拜年的好話語，好禮就無法度送予你。
3.共你「手機仔傳好話」的畫面掠圖掠落來抑是共過程錄起來，貼去恁個人的面冊FB、Instagram抑是Threads公開，閣再共設一个「#台灣台語輸入法」的標記。
4.上尾一步是報名，會記得共「台灣台語輸入法」APP開開，佇APP的「設定」→「意見回饋」內底，回報你的字姓佮正名、手機仔號碼、你發文的平台佮分享文的連結，按呢報名愛添的資料就有齊勻。

這擺活動的紅包是蓋大包喔，獎品有：頭獎1萬箍（1名）、二獎2千箍（5名）、三獎1千箍（10名）佮參加獎2百箍（50名）。教育部誠心招咱全民做陣用教育部的APP來「相賽講台語，用話傳好字」。今年咱就用上溫暖的台灣台語，來共親朋五十拜正過好年，全民相